Ceerigaabo (Up) Madaxweynaha Somaliland Md. Daahir Rayaale Kaahin iyo weftigii uu Hoggaaminayay, ayaa  saaka kormeer ku soo maray degmooyinka Ceel Af-weyn iyo Gar-adag. Madaxweynaha Somaliland oo saaka waabarigii ka ambo baxay magaalada Ceerigaabo ayaa gaadhay degmada Ceel afweyn

waxaana halkaasi ku soo dhaweeyay Boqolaal dadweyne ah oo ka mid ah bulshada ku dhaqan degmadaasi. Kuwaasi oo tubnaa wadooyinka hareeraheeda waxaanay lulayeen sawirka Madaxweynaha iyo Madaxweyne ku Xigeenka oo ah murashaxiinta xisbiga UDUB uga qeyb galaya doorashada madaxtooyada ee dalka ka qabsoomaysa 26-ka Bishan June. 

Madaxweynaha Somaliland Md. Daahir Rayaale Kaahin, oo la hadlay dadweynihii tirada badnaa ee soo dhaweeyay ayaa uga mahad celiyay sida balaadhan ee ay u qaabileen, waxaanu uga xog waramay waxyaabihii xukuumadiisu qabatay muddo sideed sano ku dhow oo uu xilka hayay, waxaanu sheegay in xukuumadu wax badan ka qabatay arrimaha bulshada, Nabadgelyada iyo sidii dalkan qadiyadiisa loo gaadhsiin lahaa beesha caalamka. 

Madaxweyne Rayaale wuxuu ka dalbaday shacbiga Degmada Ceel afweyn inay mar kale codkooda siiyaan si uu u dhamaystiro waxyaabaha qabyada ah ee aan u qabsoomin waxaanu xusay inuu wax weyn u qaban doono horumarinta degmadaasi iyo baahiyaheeda kala duwan. 

Dhinaca kale, waxa Madaxweynaha Somaliland iyo weftigiisa ay u kicitimeen Degmada Gar-adag ee Gobolka Sanaag, halkaasi oo iyana si weyn loogu soo dhaweeyay, waxaana weftiga madaxweynaha lagaga hor yimid meel u jirta 10 km waxaana lagu soo dhaweeyay Fardo iyo gaadiid aad u tiro badan.